Kayonza abanyeshuri bakoreshwa mu kumesa ngo babone uko barya ku ishuri

Mukarere ka Kayonza ho m’uburasirazuba bw’u Rwanda haravugwa ikibazo cy’abanyeshuri bakoreshwa imirimo y’amaboko irimo kumesera abarimu no gukoropa amashuri kugirango bakunde bagaburirwe muri gahunda ya leta yo kugaburira abana kumashuri. Bamwe mubanyeshuri twaganiriye ni abo k’urwunge rw’amashuri rwa Gikaya m’umurenge wa Nyamirama aho bavuga ko iyi mirimo bayikoreshwa n’ubuyobozi bw’ishuri kuko baba babuze amafaranga yo gutanga. Umuyobozi w’intara y’u Burasirazuba Madame Uwamaliya Odette yabwiye Radio Izuba ko bitemewe gukoresha umwana imirimo isa nkaho ari igihano kugirango akunde agaburirwe ku ishuri avuga ko agiye guhita akurikirana iki kibazo.

Leta y’u Rwanda yashyizeho iyi gahunda yo kugaburira abana kumashuri biga mu burezi bw’ibanze bw’imyaka 9 na 12 hagamijwe ko abana biga neza nta kibazo cy’inzara kuko byari bimaze kugaragara ko bagezaga amasaha yo gutaha batagikurikirana neza amasomo kubera inzara. Leta ivuga ko umwana utishoboye atirukanwa ngo ahubwo afashwa kuburyo abona uburyo asangira na bagenzi be ku ishuri. Gusa bimwe mubigo by’amashuri byo muntara y’I Burasirazuba bo bahisemo guha abana akazi kwishuri mugihe yabuze amafaranga cyangwa se ibiryo byo gusangira n’abandi ku ishuri. Twasuye kimwe muri bigo by’amashuri bigaragaraho iki kibazo, tujya kuri groupe scolaire Gikaya ni m’umurenge wa Nyamirama akarere ka Kayonza abanyeshuri twaganiriye batubwiye ko ababuze amafaranga yo kurya bakoreshwa imirimo itandukanye nko kumesera abarimu,kumesa imyenda y’abakinnyi b’ikigo, gukoropa amashuri n’ibindi.

Mukamana Alphonsine uyobora iri shuri rya Groupe Scolaire Gikaya yatwemereye ko koko abana batishyura amafaranga yo kurya babaha imirimo bakora ku ishuri gusa we ngo babikora kugrango abo bana bibone ko batarira ubusa.
Guverineri w’intara y’u Burasirazuba Madame Uwamariya Odette yatubwiye ko ibi bintu bitemewe ngo kuko umwana utishoboye ntagomba gukoreshwa imirimo ku ishuri ahubwo aho kugirango ayikoreshwe yakwihanganirwa ngo nacyane ko iyi mirimo itabyara amafaranga cyangwa ngo yongere ubwinshi bw’ibiryo ku ishuri.

Guverineri Uwamaliya kandi arongeraho ko iki kibazo bagiye kugikurikirana nahandi kiri gicike burundu ngo nacyane ko ari ubwambere abyumvise muri iyi ntara.
Ubu buryo bwo gukoresha abana imirmo runaka kugiango bakunde bagaburirwe ku ishuri nubwo yamaganwa n’umuyobozi w’intara y’uburasirazuba ntanubwo n’aba bana babyishimira ngo kuko bibatera ipfunwe muri bagenzi babo.

Add new comment

Plain text

  • No HTML tags allowed.
  • Web page addresses and e-mail addresses turn into links automatically.
  • Lines and paragraphs break automatically.

© 2014, Radio Izuba - Powered by Babone K. Salvador